Црквата посветена на „Св. Климент Охридски“ е единствената црква во Охрид која изворно му била посветена на Охридскиот Чудотворец. Изградена е во 1378 година од страна на ктиторот свештеникот Стефан. Таа се наоѓа во стариот дел од градот, на улица Методи Патчев и веднаш над познатата Куќа на Робевци. Охриѓаните оваа црква ја нарекуваат Мал Свети Климент, бидејќи токму во неа биле пренесени моштите на св. Климент Охридски, кога манастирот „Св. Пантелејмон“ бил претворен во џамија од страна на Осмналиските завојувачи. Црквата претставува еднокорабна градба со тристрана апсида од источната страна и влез во јужната страна. Според сегашната позиција на црквата, нејзиниот северен ѕид е околу половина од висината во земја, односно над него има улична патека која води кон внатрешноста на стариот дел од градот. Внатре во црквата е сочуван фрескоживописот од времето кога била изградена. Особено се сочувани портретите на светите Климент и Наум Охридски, кои стојат помеѓу свети Никола. Во црквата не е сочуван иконостасот, но има десетина икони кои се поставени на една хоризонтална греда, во чија средина е поставено дрвено Распетие. Овие дела се веројатно од почетокот на XIX век. Црквата е отворена само повремено.