Црквата „Св. Богородица“ – Челница се наоѓа во маалото Месокастро во стариот дел од Охрид до улицата Климентов Универзитет. До неа може да се дојде преку наведената улица, а може и пеш симнувајќи се надолу од црквата „Св. Богородица – Перивлепта“ и ЦОУ „Св. Климент Охридски“. Оваа црква изобилува со своевидни раритети. На пример, таа е единствената црква не само во Дебарско-кичевска епархија туку и во Р. Македонија, која претставува двобродна градба. Двата кораби внатрешно се поврзани со арки и камени столбови, од кои јужната арка е поголема, а северната е помала. Изградена е на темелите на постара средновековна црква, која што во најголем дел се наоѓа под денешната црква. И не само тоа, туку и од јужниот ѕид на црквата, кој се спушта многу подолу кон средновековната црква, има врата која води внатре во првичната архитектура. Според некои истражувачи оваа црква потекнува од IX век и била изградена од бугарскиот владетел Борис, додека други истражувачи времето на изградбата го сместуваат во XIV век. Во црквата е запазен најстариот фрескоживопис од XIV век, од кој има фрагменти на јужната и северната страна од ѕидот над арката. Црквата претставува двокорабна градба во внатрешноста, додека од надвор е покриена под еден покрив од керамиди, поставени на две страни. На западната страна од црквата има припрата, а пред неа е влезната врата на која десно има мала просторија каде што се продаваат свеќи и во состав на просторијата и западниот ѕид од припратата е изградена камбанарија во приближно иста височина како и црквата. Во камбанаријата има една камбана. Во камбанаријата има една камбана. Во припратата нема фрески, а на влезот во наосот лево и десно од влезната врата се поставени две големи престолни икони. Во внатрешноста освен делови од првиот фрескоживопис од XIV век има и понови фрески кои се завршени на 20.XI.1862 година од страна на Дичо Зограф од Тресонче. Подоцна се извршени интервенции и делови од црквата се насликани и обновени од зографот Коле Момиров во 1901 година. Истата година е извршено преосветување на црквата од егзархискиот владика Методиј. Во црквата има постар иконостас. Долните дрвени плочи под престолните икони се насликани со флорални декорации. На иконостасот има 4 престолни икони и царски двери над кои има насликано полукружен надвратник. Северната врата преку која се влегува во олтарот се наоѓа на северниот брод, и на неа има една икона насликана во целата должина. На престолните икони има хоризонтална даска на која се насликани 12 апостоли и Деизис, односно вкупно 15 ликови. Над нив има резбано украсено Распетие. На сверните двери е запишано името на Димитриј Зограф, и годината 15.V 1862 година, односно тоа е познатиот Дичо Зограф од Тресонче. Во поново време се избршени повеќе реконструтивни зафати во црквата, во олтарскиот дел е поставена нова мермерна плоча на светиот престол, уреден е дрковниот двор, променет е покривот со нови керамиди и слично. Преосветувањето на светито престол во црквата е извршено на 7.VIII 2011 година од страна на митрополитот Тимотеј. Во црквата повеќе пати во годината се богослужи света Литургија. Црквата е секојдневно отворена за верниците и посетителите.