Анот бил изграден кон крајот на XV век од страна на големиот везир Даут-паша и претставувал дел од големиот вакаф на овој легатор завештан за неговите задужбини во Истанбул (џамија, медреса и имарет). Тоа бил еден од повеќето објекти што Даут-паша ги изградил во Скопје, а кои биле лоцирани на просторот од Камениот мост, па заклучно со Даут-пашиниот амам. Во документ за попис на вакафот (1546-1568) овој ан е запишан како Робовски ан (han-i esiran) со приход од 20 000 акчиња. Претставувал цврста монументална градба, но сигурно настрадал во повеќето катастрофи што се случувале во Скопје.